ತಿಂಗಳ ಆ ದಿನಗಳಲ್ಲಿ ಹಾಟ್ ಬ್ಯಾಗಿಗೆ ನೀರು ತುಂಬಿಸಿ
ಹೊಟ್ಟೆಯ ಮೇಲಿಟ್ಟು ನೋವು ಕಡಿಮೆಯಾಯಿತೇ
ಎಂದು ಅವನ ಕಣ್ಣಲ್ಲಿ ಮೂಡುವ ಆತಂಕ ಕವಿತೆ

ಅರ್ಧರಾತ್ರಿ ದೆವ್ವದ ಕನಸು ಬಿದ್ದು
ಭಯದಿಂದ ಕಿರುಚಾಡಿ ಕನವರಿಸುವಾಗ
ತೋಳಿಗೆಳೆದುಕೊಂಡು ತಟ್ಟಿ ಮಲಗಿಸುವ ಅವನು ಕವಿತೆ

ದೀರ್ಘ ನಿದ್ದೆಯಲ್ಲೂ ತುಟಿಯ ಮೇಲೆ
ಅರ್ಧ ಚಂದಿರ ಮೂಡಿಸುವ
ಅವನ ಬಿಸಿಯುಸಿರ ಕಚಗುಳಿ  ಕವಿತೆ

ನಿದ್ದೆ ಹೋಗಿರುವ ಇವನೂ
ಕವಿತೆಯಾಗಲೆಂದು ಕಾಯುತ್ತಿರುವೆ

ನಿನ್ನೊಡನೆ ಪಿಸುಮಾತುಗಳೊಂದಿಷ್ಟು ಆಡುವುದಿದೆ
ಬದುಕೆಲ್ಲ ಹೊತ್ತು ಬಾ

ಇವ ಸಿಕ್ಕಾಪಟ್ಟೆ ನಗಿಸುವಾಗೆಲ್ಲ
ಕಣ್ಣಲ್ಲಿ ಬರುವ ಸಿಹಿನೀರು ಕವಿತೆ
ಇಡೀ ಜಗವ ಮರೆಸುವ ತಾಕತ್ತು ಇರುವ
ಅವನ  ನೆನಪು ಕವಿತೆ

ನೀನು ನೆನಪಾಗುತ್ತೀಯ
ಯಾವಾಗಲೂ
ನಾ ಉಸಿರಾಡುವಾಗೊಮ್ಮೆ ಮಾತ್ರ