ಹೆಣ್ಣಾಗಬೇಕು 

ಹಕ್ಕಿಯಾಗಬೇಕು 
ಪಂಜರದಲ್ಲಿ ಬಂಧಿಯಾಗಲಾರದ, ಗಿಳಿಪಾಠಕ್ಕೆ ಪಕ್ಕಾಗದ 
ಆಕಾಶದೆತ್ತರಕ್ಕೆ ಹಾರಿ 
ನೀಲಿಬಾನಲಿ ಬಿಮ್ಮನೆ ವಿಹರಿಸುವ ಹದ್ದಾಗಬೇಕು.. 

ಹೂವಾಗಬೇಕು 
ಯಾರ ಜಡೆಯೂ ಏರದ,
ದೊಡ್ಡ ಮಹಲುಗಳ ಚಿತ್ತಾರದ ಹೂದಾನಿ ಸೇರದ 
ತನ್ನಷ್ಟಕ್ಕೆ ತಾನು ಬಿರಿದು ಕಂಪು ಚೆಲ್ಲುವ ಆಕಾಶಮಲ್ಲಿಗೆಯಾಗಬೇಕು... 

ನದಿಯಾಗಬೇಕು 
ಆಣೆಕಟ್ಟುಗಳ ಗೋಡೆಯ ಹಿಂದೆ ಕಣ್ಣೀರಿಡದ,
ಕಣಿವೆ ಕಂದರಗಳ ಕೊರೆದು,
ಕಾಡು ಮೇಡುಗಳಲ್ಲಿ ಜಲಪಾತವಾಗಿ 
ಸೊಕ್ಕಿ ಧುಮ್ಮಿಕ್ಕುವ ಬ್ರಹ್ಮಪುತ್ರೆಯಾಗಬೇಕು (ಕಾಳಿಯಾಗಬೇಕು)

ಹೆಣ್ಣಾಗಬೇಕು 
ಮೊಲೆಕಟ್ಟಿನ ಭಾರ, ಬಣ್ಣಗಳ ಸೋಗು, ಮೂಗುತಿಯ ಹೊರೆ 
ಕಾಲಂದಿಗೆಗಳ ಬೇಡಿ, ಇದಾವುದೂ ಇಲ್ಲದ,
ಸಾಗರನ ಅನಂತತೆಯ ಬೆತ್ತಲೆ ಮೈಗೆ ಆವಾಹಿಸಿಕೊಂಡು 
ಕಡಲ ಗಾಳಿ, ಅಲೆಗಳಿಗೆ ಸೆಡ್ಡು ಹೊಡೆದು ನಿಂತ 
ಅಪ್ಪಟ ಪ್ರಕೃತಿಯಾಗಬೇಕು..