ಓದು                                                      

ನಿನ್ನನ್ನೊಮ್ಮೆ ಓದಬೇಕಿದೆ,
ತೀವ್ರವಾಗಿ, ಮುನ್ನುಡಿಯಿಂದ ಕೊನೆಪುಟದವರೆಗೆ... 
ನಾನಂತೂ ಎಂದಿಗೂ ತೆರೆದ ಪುಸ್ತಕ...  
ಪ್ರತೀ ಅಧ್ಯಾಯವೂ ಸ್ವಚ್ಚಂದ, ಸರಳ 
ತೀರ ನಿನ್ನೆದೆಗೆ ನಾಟಿಬಿಡಬಹುದು...  
ಎಲ್ಲ ಸಾಲಲ್ಲೂ ಅಪ್ಪಟ 'ನಾನು' 
ನಿನ್ನ ನೆಚ್ಚಿನ ಪುಸ್ತಕದ ಪಟ್ಟಿಗೆ ಸೇರಿಯೂಬಿಡಬಹುದು... 
ಒಮ್ಮೆ ಅನುವು ಮಾಡಿಕೊಂಡು ಓದಿಯೇ ಬಿಡು 
ಹಾಗೇ ನಿನ್ನನೊಮ್ಮೆ ಓದುವ ಅವಕಾಶವನ್ನೂ ನೀಡಿಬಿಡು.. 

ಜರೂರಿ 

ಪ್ರೀತಿಯಂಗಡಿಯಲ್ಲಿ 

ಹೃದಯ ಗಿರವಿ ಇಟ್ಟಾಗಿದೆ.. 

ನನಗೀಗ ಅದ ಹಿಂಪಡೆಯುವ ಜರೂರಿ

ಅರ್ಧ ಸೇರು ಕಣ್ಣೀರು, ಒಂದು ಮಣ  ನಿಟ್ಟುಸಿರು, ರಾಶಿ ನೆನಪುಗಳು

ಸದ್ಯಕ್ಕಿರುವುದು ಇಷ್ಟೇ, ಒಪ್ಪಿಸಿಕೋ 

ಬಾ ವ್ಯವಹಾರ ಚುಕ್ತಾ ಮಾಡಿಬಿಡೋಣ, ಏಕೆಂದರೆ 

ನನಗೀಗ ಹೃದಯ ಹಿಂಪಡೆಯುವ ಜರೂರಿ...