ಓ ಗಂಡಸರೇ ನೀವೆಷ್ಟು ಒಳ್ಳೆಯವರು

ಓ ಗಂಡಸರೇ ನೀವೆಷ್ಟು ಒಳ್ಳೆಯವರು

ಓ ಗಂಡಸರೇ ನೀವೆಷ್ಟು ಒಳ್ಳೆಯವರು
ಸುಕೋಮಲೆ, ಸುಭಾಷಿಣಿ, ಕ್ಷಮಯಾ ಧರಿತ್ರಿ
ಎಂದೆಲ್ಲ ನನ್ನ ಪರಿಪರಿಯಾಗಿ ಬಣ್ಣಿಸುವ
ಓ ಗಂಡಸರೇ ನೀವೆಷ್ಟು ಒಳ್ಳೆಯವರು

ಪಾರ್ಲರಿನ ಹುಡುಗಿಯ ಮುಂದೆ ಬೆತ್ತಲಾಗಿ ನಿಂತು
ಬೆಲ್ಲದ ಪಾಕವ ಮೈಗೆಲ್ಲ ಅಂಟಿಸಿಕೊಂಡು
ಜೀವ ಹೋಗುವ ನೋವಾದರೂ
ರೋಮರಹಿತ ದೇಹವ ಮಟ್ಟಸವಾಗಿಸಿಕೊಳ್ಳುವ ನನ್ನ ಮುಟ್ಟಿ ನೋಡಿ
ಆಹಾ ಎಷ್ಟು ನುಣುಪು ಎಂದು ಹೊಗಳುವ
ಓ ಗಂಡಸರೇ ನೀವೆಷ್ಟು ಒಳ್ಳೆಯವರು!!

ಲಕ್ಷಗಟ್ಟಲೆ ದುಡಿದು ನಿಮ್ಮ ಕೈಗಿಟ್ಟು
ಸೀರೆ ಕೊಡಿಸು ಒಡವೆ ಕೊಡಿಸೆಂದು ದುಂಬಾಲು ಬಿದ್ದು
ಆ "ಎಲ್ಲವ ''  ಕೊಡಿಸಿಕೊಂಡು ಹಿಗ್ಗಿನಿಂದ ಬೀಗುವ
ನನ್ನೆಡೆಗೆ ನೋಡಿ ತೃಪ್ತಿಯಿಂದ ಹೃದಯ ತುಂಬಿಕೊಳ್ಳುವ
 ಓ ಗಂಡಸರೇ ನೀವೆಷ್ಟು ಒಳ್ಳೆಯವರು!!
 
 ನಸುಕಿನಲೇ ಎದ್ದು, ನೀನೇ ಇಂದ್ರ ನೀನೇ ಚಂದ್ರ
ನೀನೇ ಪರದೈವ ಎಂದು ಕಾಲುಮುಟ್ಟಿ,
 ನೀ ಕಟ್ಟಿದ ತಾಳಿಯೇ ದುಷ್ಟ ರಕ್ಷಕ
ಎಂದು ಕಣ್ಣಿಗೊತ್ತಿಕೊಳ್ಳುವಾಗ ಅದ ನೋಡಿ ಕಣ್ಣ ತುಂಬಾ
ಪ್ರೀತಿಯ ಹೊಳಪ ತುಂಬಿಕೊಳ್ಳುವ
ಓ ಗಂಡಸರೇ ನೀವೆಷ್ಟು ಒಳ್ಳೆಯವರು!!

ನನ್ನ ಮನುಷ್ಯ ಜಾತಿಯ ಹೊಟ್ಟೆ ಕೆಟ್ಟು
ದೇವರು ಕೊಟ್ಟ ಪೀಪಿ ಸದ್ದುಮಾಡುವಾಗ,
ಕೆಲವೊಮ್ಮೆ ಭೂರಿ ಭೋಜನದ ಆನಂದದಿಂದ ಉಬ್ಬಿ
ಅನ್ನನಾಳ ಓಓಓ ...ಬ್ ಎಂದು ಸದ್ದು ಮಾಡುವಾಗ
ಮತ್ತೊಮ್ಮೆ ನಾ ಸುಕೋಮಲೆ ಎಂದು ಮನವರಿಕೆ
ಮಾಡಿಕೊಡುವ ಓ ಗಂಡಸರೇ ನೀವೆಷ್ಟು ಒಳ್ಳೆಯವರು!!

ಇವರು

"ಇವರು"

ಬೇಲಿ ಕಟ್ಟಬಾರದು ನೀವು ಇವರಿಗೆ

ಮನುಷ್ಯ ಜಾತಿಯ "ಇವರ" ಆಸೆಗಳಿಗೆ

ದಟ್ಟ ಜನಜಂಗುಳಿಯ ಖಾಲೀತನಗಳ

ಖುಲಾಸೆ ಮಾಡಿಕೊಳ್ಳಲು ಬಿಡಿ ನೀವು

ಅನ್ನ ನೀರುಗಳೆಂದೂ ಆತ್ಮವ ತುಂಬಿಸಿಯೇ ಇಲ್ಲ

ಮುಪ್ಪಿನ ಪಹರೆಯಲ್ಲಿ ಕುದಿಯುತ್ತಿರುವ ಮೋಹಗಳ

ಉಕ್ಕಲು ಬಿಡಿ ನೀವು

ತುಟಿಗಳೆಂದೂ ಅದಿರೇ ಇಲ್ಲ, ಮೈಯೆಂದೂ ನವಿರೆದ್ದ ಖುನೇ ಇಲ್ಲ

ಕಿಟಕಿಯ ಸರಳುಗಳೀಚೆ ಗಸ್ತು ಹೊಡೆಯುತ್ತಿರುವ

ಕನಸುಗಳ ವಿಹರಿಸಲು ಬಿಡಿ  ನೀವು

ರೆಕ್ಕೆಗಳ ಅಸ್ಮಿತೆಯೇ ಗೊತ್ತಿಲ್ಲ ಇವಕ್ಕೆ

ಸೆರಗಿನಡಿಯ ತುಂಬಿದೆದೆಯ ಆಳದಲ್ಲಿರುವ

ರಂಗುರಂಗಿನ ಬಣ್ಣಗಳ ಪ್ರತಿಫಲಿಸಲು ಬಿಡಿ

ಬೆಳಕಿನ ನಸೀಬೇ ದಕ್ಕಿಲ್ಲ ಇವಕ್ಕೆ